Crynodeb o Adroddiad Blynyddol 2022/23 – am yr adroddiad hwn

Mae’r meysydd sy’n cael eu trafod yn yr adroddiad hwn yn cynnwys:

• Awdurdodiad – mae hyn yn cynnwys ein gwaith ar sut rydym yn penderfynu awdurdodi cwmnïau ac unigolion a nifer y cwmnïau a’r unigolion rydym yn eu rheoleiddio. Rydym yn parhau i weld y proffesiwn yn tyfu bob blwyddyn, tra bo nifer y cwmnïau cyfreithiol yn gostwng.
• Diogelu Cleientiaid – mae hyn yn adrodd am ein hymyriadau (lle rydym i bob pwrpas yn cau practis cwmni neu gyfreithiwr) a sut rydym yn rheoli’r gronfa iawndal. Gall y gronfa wneud taliadau i aelodau’r cyhoedd a busnesau bach i gymryd lle arian a gymerwyd neu a ddefnyddiwyd yn amhriodol gan eu cyfreithiwr. Gwelsom y nifer uchaf mewn saith mlynedd o ymyriadau roeddem wedi’u cynnal yn 2022/23, yn ogystal â’r swm roeddem wedi’i dalu o’n cronfa iawndal.
• Addysg a Hyfforddiant – mae hyn yn cynnwys gwybodaeth am nifer y cyfreithwyr sydd newydd gymhwyso sy’n ymuno â’r proffesiwn, yn ogystal â nifer y prentisiaid cyfreithwyr. Mae nifer yr unigolion a gymhwysodd drwy’r Arholiad Cymhwyso Cyfreithwyr yn parhau i dyfu wrth iddo ddod yn brif lwybr tuag at y proffesiwn. Ac mae nifer y cofrestriadau newydd ar gyfer prentisiaid cyfreithwyr wedi cynyddu o 33% o’i gymharu â’r llynedd.
• Cydraddoldeb, Amrywiaeth a Chynhwysiant – mae hyn yn rhoi’r diweddaraf am y cynnydd yn erbyn pum thema allweddol a luniodd ein gwaith yn 2022/23. Roedd y rhain yn cynnwys gwella ein dealltwriaeth o amrywiaeth yn y proffesiwn drwy gyhoeddi ein hadnodd amrywiaeth wedi’i ddiweddaru a dau ddarn sylweddol o ymchwil.
• Cynnal Safonau Proffesiynol a Themâu Gorfodi Allweddol – mae hyn yn trafod tueddiadau yn yr adroddiadau am bryderon a gawn ynghylch cyfreithwyr a chwmnïau, y mathau o gamau gorfodi a gymerwn a’r themâu yn ein gwaith gorfodi. Roeddem wedi cymryd mwy o gamau rheoleiddio yn 2022/23 o’i gymharu â blynyddoedd blaenorol, a oedd wedi cael ei sbarduno’n bennaf gan gynnydd yn ein gwaith rhagweithiol i wirio cydymffurfiaeth â’n rheolau. Rydym hefyd wedi bod yn bwrw ymlaen â gwaith i wella prydlondeb ac ansawdd ein gwaith ymchwilio a gorfodi. Un o’r prif flaenoriaethau fu lleihau nifer yr ymchwiliadau hirsefydlog. O ganlyniad, fe wnaethom atgyfeirio mwy o achosion at y Tribiwnlys Disgyblu Cyfreithwyr o’i gymharu â blynyddoedd blaenorol.
• Gwaith Monitro Amrywiaeth – dyma’r bumed flwyddyn i ni adrodd am nodweddion amrywiaeth y bobl sy’n rhan o’n prosesau ymchwilio a gorfodi. Rydym ni’n parhau i weld dynion ac unigolion o gefndir Du, Asiaidd ac Ethnig Leiafrifol yn cael eu gorgynrychioli yn y pryderon a adroddwyd i ni, o gymharu â’r boblogaeth sy’n ymarfer. Mae’r orgynrychiolaeth yn uwch pan fydd achosion yn pasio ein prawf trothwy asesu ac rydym yn penderfynu ymchwilio iddynt. Gwnaethom gyhoeddi canfyddiadau darn sylweddol o ymchwil i'r gwaith hwn, a gynhaliwyd gan gonsortiwm annibynnol.